By: Saneliso Mlambo
Banikele ezinkundleni zokuxhumana beyozwakalisa ulaka ngezinqumo ezenziwe ngunompempe emdlalweni wokuvula wendebe yomhlaba yabesifazane obuphakathi kwe South Africa ne Spain abalandeli bebhola eNingizimu Africa.
IBanyana iyona evule inkundla ngegoli likaThembi Kgatlana ngomzuzu wama 25, ISpain sibuye nezimpendulo zamagoli amathathu ngomzuliswano wesibili nokuholele ekutheni bawunqobe umdlalo ngo 3-1.
Amaphenathi amabili atholwe iqembu lase Spain ngomzuzu wama 69 no 82, abaselwa enethini ngu Jennifer Hermoso ogijima kwiqembu labesifazane le Atletico Madrid, kanye nokukhishwa ngekhadi elibomvu komdlali wasemuva uNothando Vilakazi ikona okususe ukuxokozela ezinkundleni zokuxhumana.
Abalandeli bakhala ngabakubiza ngokwenzelela kukanompepe u Carvajal Maria ongowokudabuka ezweni lase Chile obephethe umdlalo, kanye nendida edalwe ubuchwepheshe besimanje obusetshenziswa ukulekelela isinqumo sikanompempe i- video Assistant referee (VAR).
Abalandeli bazwakalise ukungenami ngendela isiwombe sesibili ebesiphethwe ngayo ngunondweba nabasizi bakhe.
UMthunzi Kweyama, ungomunye wabanikele kuTwitter emva komdlalo ukuyozwakalisa ulaka lwakhe.
“Kuyaphoxa ukubona indlela onompempe abasingatha ngakhona imidlalo eseqophelweni eliphezulu ngalendlela. Umbuzo engisele nawo njengamanje owokuthi ingabe loku kuzokwenzeka kuwo wonke amazwe ayingxenye yalomqhudelwano noma yibhadi elibekelwe amazwe ase -Africa kuphela?”
uMthunzi ube esegcizelela ethi, “iFIFA kumele ilubhekisise udaba lobuchwepheshe ebholeni likanobhutshuzwayo, kungenjalo umdlalo wethu esiwuthandayo uzofa uphele nya.”
uNomagugu Nxesi uthe, ” Sibanjwe inkunzi ilanga libalele. Ngokwami lomqhudelwano ebengiwulangazelele ngamehlo abomvu sewonakele. Akuwona amaphenathi lawa, ngisho ingane encane esakhasa iyakubona loko.”
Abanye bancome baphinda bahalalisela ibanyana ngokudlala ibhola elisezingeni lomhlaba kanye nokubonisa ukuzethemba emdlalweni wokuqala wendebe yomhlaba.
INingizimu Africa izobhekana neqembu laseChina emdlalweni olandelayo ngolwesine e-Parc des Princes e-Paris.